中海外AGM 郝建民沒答問題

【明報專訊】近排內地樓市吹淡風，唔少地方嘅樓市成交異常靜，最新有傳阿爺終於忍唔住，出手放寬非一線城市嘅限購令，呢幾日內房股價表現非常生猛。內地龍頭之一嘅中國海外（0688）噚日搞股東會（AGM），主席兼行政總裁郝建民就唔肯接受訪問，無回應放寬限購令嘅傳聞。


如果內地真係放寬二、三線城市嘅限購令，相信內房銷售勢將會回升，噚日小琴特登去到中海外股東會，睇下會唔會八到咩料，不過中海外主席郝建民噚日表現幾cool，無論小琴同一班行家點問，佢都只係微笑、揮揮手，最終一句都無答到就走咗。至於同場嘅中海外獨立非執董、東亞銀行（0023）副行政總裁李民斌就話，如果內地放寬樓市限購令屬實，相信將對內地樓市有正面支持，不過佢話東亞向來喺內地嘅按揭業務都好穩定，估計就唔會有好大影響。


[小琴密語]