小妹妹歌聲撐佔中

【明報專訊】「佔領中環」6月20至22日舉行全民投票，選出一個屬於佔中嘅普選方案，唔少人視投票係爭取民主嘅關鍵。噚日佔中facebook專頁就貼出一首改編自歌劇《孤星淚》（Les Misérables）Do you hear the people sing？嘅港版《問誰未發聲》音樂短片，由一個剪咗冬菇頭髮型嘅小女孩，用天真童聲演譯「試問誰還未發聲，都捨我其誰衛我城……人既是人，有責任有自由決定遠景」。


唔少網民視呢首《問誰未發聲》係6．22全民投票主題曲，有網友留言話歌詞寫得好精彩，仲話邊聽邊流眼淚。佔中就喺專頁呼籲大家6．22出來投票，留住獨一無二嘅香港，更重要係香港人有責任守護小朋友嘅純真。


呢段短片，令人諗起2008年京奧開幕禮時小妹妹唱歌一幕。不過，講來都奇，呢段片唔係佔中拍，而係有熱心人自己製作放上網幫佔中宣傳，聞說作品出自廣告界人士，而佔中方面都想知道係邊位熱心人幫助。想睇片嘅，可以去佔中facebook或上YouTube搜尋「孩子問：誰還未覺醒」就有。