梁敬國讚亞視《殭屍》《天蠶變》

【明報專訊】多得立法會主席曾鈺成，原本無乜人識嘅商務及經濟發展局副局長梁敬國連日曝光，噚日仲喺商台訪問中高談闊論。梁敬國工作嘅政策局睇埋廣播政策，主持人問佢有關免費電視發牌嘅問題時，佢就讚亞視有好多好節目，希望可以做得更好，不過佢舉例子話亞視節目好嘅，似乎都係舊片，仲要係不時重播嘅節目，「好似《我和殭屍有個約會》、《天蠶變》、《天龍訣》做得幾好，我細路仔時代已經睇」，令主持都忍唔住笑。


咁近期有咩好節目呀？梁敬國諗咗一陣，就話《感動香港》唔錯，令人知道啲好人好事。唔知讀者又有無睇過呢？


梁敬國喺節目中亦談及工作，話自己同各商會聯繫、審視競爭條例等，強調自己不斷有同議員溝通，亦有幫手拉票。佢又話加入政府唔係考慮人工（月薪逾18萬元），而係希望幫商界推廣香港商業，雖然貴為政治委任官員，但梁敬國就話「我唔係做官，我係做事」。