唐唐家族史出書

【明報專訊】唔少人都知道，全國政協常委唐英年（唐唐）出身大家族，係江蘇人，最近有同係唐氏族人嘅內地記者，出版咗一本近300頁嘅《百年毗陵唐氏》，講吓唐氏家族，原來唐英年已經係毗陵唐氏第21世孫，作為家族中嘅名人，書中亦有章節講到佢，仲揭露原來唐媽媽唐尤淑圻係個嚴母。


書中講到，唐媽媽話當年3子1女個個都聰明，佢哋細個放學後，就會圍住喺圓枱做功課，佢會喺枱上放一把大間尺，邊個分心或者做功課唔認真，佢就拎住把間尺拍打張枱，一拍就嚇死佢哋，於是仔女做功課都快啲。唐媽媽話自己非常嚴格，所以仔女都自覺做功課，個個讀書名列前茅，最終3個仔女做工業（包括唐英年），1個做醫生。


唐唐11歲已懂看馬

唐唐出咗名鍾意飲紅酒，對馬亦好有研究，原來佢11歲時已經識睇馬，話說當時佢阿爸唐翔千去馬場後返屋企，一入屋唐唐就同佢講，「今天你養的馬跑不出，是因為馬姿不好」，原來佢阿爸入馬場，佢就喺電視睇。


唐唐亦有講到教仔女心得，佢話最重要係培養佢哋成為負責嘅人，對國家有一定認識、對社會有貢獻、愛護家人等，又話仔女讀書成績唔錯，好少犯大錯，因為佢哋都知道自己係代表唐唐嘅一部分。


唐唐上星期同家人去到家鄉常州，出席呢本書嘅首發儀式，佢致辭時透露，家族由16世紀開始，就用清代狀元陸潤庠嘅對聯「勳培鎮國千年盛，積德傳家百世昌」排字輩。