互諷多年無建樹 長毛馮振超嗌交

【明報專訊】特首梁振英喺上周特首答問大會上狠批拉布、掟嘢等行為，最終社民連「長毛」梁國雄、人民力量陳偉業同陳志全3人抗議，會議終止，連行會召集人林煥光都形容行政、立法關係去到臨界點；《城市論壇》都以此為題，請咗立法會議員梁國雄、馬逢國等人做嘉賓，但成個節目火藥味濃，各嘉賓不時搶白反駁對方，都幾混亂。


馬逢國﹕林煥光說法誇張

長毛質疑，其他國家元首都唔會因為擔心被刺殺而唔去國會，質疑梁振英如果驚人掟嘢，就唔好做政客。馬逢國唔同意，認為特首喺答問大會代表政府發表立場無可厚非，但就話林煥光嘅講法，話行政立法關係去到臨界點係言過其實、誇張咗。


時事評論員馮振超話要譴責長毛，話佢咁多年無進步過，質疑對方就算用咩方法，都無令政府聽佢講而改變，此話一出，長毛立即反駁，反鬧馮振超，做評論員咁耐，同樣無令政府改變。


功能組別議員馬逢國話，立法會應該文明理性咁同政府溝通，但長毛就話如果文明建基於不平等制度上，就係侮辱咗文明兩個字，因為議會有功能組別，16個議員仲要自動當選，本身就有問題。除咗台上激烈，台下亦有大批熱血公民成員同維園阿伯不時針鋒相對，火藥味十足。