一朝爆紅 梁敬國多謝曾主席

【明報專訊】商務及經濟發展局副局長梁敬國上周五出席立法會時，坐喺官員席上，但無論係立法會主席曾鈺成抑或社民連梁國雄，都無人認得佢係邊個，場面尷尬，最終曾主席要求佢自己說明一下。片段喺網上熱傳，而噚日梁敬國出席活動時，就話一啲都無唔開心，仲話「其實我要多謝（曾）主席"添"，"依"家通街爆紅呀，一朝成名！」

話搵日要拜訪曾鈺成

民建聯大埔支部辦事處噚日開幕，梁敬國亦有出席做嘉賓，佢拎起支咪時首先就問台下嘅人「你哋識我嘛？」，令大家忍唔住笑，有人就回應話「"依"家識晒喇」。佢事後接受傳媒訪問時，形容呢件係「小事一樁，何足掛齒」，仲話曾鈺成嘅見識、胸襟係佢學習對象，搵日要拜訪對方、領教吓喎。佢仲話當日同佢比較熟悉嘅議員都唔在場，亦唔方便插嘴，所以先會發生無人讀得出佢嗰名呢件事，日後會繼續搵唔熟悉嘅議員溝通。

曾：問責官要加強溝通

曾鈺成噚日喺另一場合就笑言，希望官員唔需要因為呢啲事件先令人認識，問責官員要同各方加強溝通，就可令議員及公眾認識。其實梁敬國上任8個月，如果連議員都未識佢，都真係要加倍努力喇。