港女每日照鏡36分鐘

【明報專訊】照鏡，係好多女士每日必做嘅事，有調查發現，香港成年女士每日用咗約36分鐘照鏡，但當睇到佢哋照鏡時嘅心理反應，近九成人反而會喺照鏡後扁嘴，有負面情緒，顯示大部分港女「愈照愈傷心」。


日均5.8次 最常電梯照鏡

香港基督教女青年會今個月上旬訪問咗502個18至64歲女性，發現佢哋每日平均照鏡5.8次，每日累計35.9分鐘，但就話港女唔算誇喇，調查機構拎咗喺全球做嘅同類調查比較，國際平均數係日均照鏡6.1次，共50分鐘。


港女最常喺邊度照鏡？調查發現，喺電梯同商店櫥窗分別有65%及49%，用化妝鏡嘅只排第三。調查又發現，87%受訪者照鏡時會有負面情緒，原因多為唔鍾意皮膚狀况、睇落較肥、狀態唔好，更有12%嘅30歲以上受訪者照鏡時感到焦慮，比國際同年齡層女士高出一倍喎，唔通香港女士特別怕老？


學吓欣賞自己

該會婦女事工部督導主任蘇艷芳分析，香港商場同電梯都裝設好多鏡，令女士出街經常被迫照鏡，如果照鏡時常產生負面感覺，長久會影響自信。佢又話好多女仔被潮流影響，結果照鏡見到自己覺得「唔夠靚唔夠白」，變得情緒低落，佢建議女士對鏡笑多啲，學識欣賞自己嘅長處，增添自信。