港鐵歎榴槤 疑似港女捱批

【明報專訊】繼港鐵車廂食嘢變罵戰嘅「厚多士姐」事件，噚日網上又有新嘢，呢次係有人喺港鐵車廂「歎榴槤」，呢次可能係本地人所為。Emily喺互聯網瘋傳嘅相片見到，返工look、戴眼鏡、打扮斯文嘅短髮小姐，畀人拍到喺車廂座椅上低頭食榴槤一幕，張相上載幾粒鐘已經有近千個留言，有網民鬧爆「榴蓮小姐」，唔少網民亦大罵「香港人形象急劇下滑……」


港鐵噚日回應，證實前日下晝西鐵線荃灣西站有同事收到投訴，話往紅磡方向列車有人食榴槤，當職員走入車廂已經搵唔到「榴槤小姐」，所以不了了之。港鐵話，附例清楚講明入閘後，無論月台、車廂任何地方都唔可以飲食，車站列車都貼咗告示，車廂亦有廣播，希望乘客奉公守法，唔係就可能被控，最高罰款2000大元。


（網上圖片）