王國興叫梁班子 唔出糧抗拉布

【明報專訊】工聯會王國興喺議會一向出位，特首梁振英（CY）噚日出席立法會答問大會，王國興就向CY獻計，建議一旦政府因為預算案「拉布」而唔好彩跌入財政懸崖，特首同問責團隊可唔可以「以民為先，先公後私，暫時不出糧，同香港市民同舟共濟」。不過，CY似乎就唔多畀面，直言問責團隊唔出糧，都幫唔到其他等住政府財政畀錢佢哋嘅人。


CY直言無幫助

CY話，家講緊嘅唔係「一筆小嘅錢」，講嘅係特區政府需要用嘅所有錢，包括增加幼稚園學券2500元、長者醫療券2000元，加強對非華語學生支援，向綜援長者發放生活津貼、向傷殘津貼受助人額外發放嘅津貼，以及為公屋住戶代繳一個月租金等。


特首認為，如果佢同問責團隊唔出糧可以畀到上述嘅錢，佢無所謂，但如果立法會唔能夠及時通過《撥款條例草案》，所有收政府錢嘅人都收唔到錢，就唔單係問責團體嘅問題喎！

興哥話知道特首同問責團隊唔出糧都只係「滄海一粟」，不過就希望起到示範作用，係關心民生嘅舉動。