66宗投訴監警秘書長 全部唔成立

【明報專訊】舊年8月，退休前休假警司劉達強同一班休班警察參與「旺角集會」，表達對小學教師林慧思以粗口辱警嘅不滿，令人關注究竟警員參與集會仲係唔係政治中立。監警會秘書長朱敏健事發後接受訪問時講當日集會係政治事件，觸發香港行動召集人、前警務人員冼澤正發起「燒豬行動」，投訴朱敏健、同樣有份接受訪問嘅主席翟紹唐同委員張達明，話佢哋「未審先判」。


監警會：無證據「未審先判」

監警會收到66宗投訴，成立咗特別委員會調查，結果全部投訴唔成立。監警會噚日發表報告話，無證據顯示佢哋「未審先判」或者對警隊有偏見。報告話佢哋接受訪問時，無明言究竟有無警務人員犯咗內部指引，而集會係唔係政治事件唔係監警會關注嘅地方，佢哋最關注係參與集會有無影響警務人員公正執法。集會當中無任何須匯報投訴需要監警會處理，所以根本唔存在「未審先判」問題，報告話係投訴人誤解監警會職能同3人所講嘅嘢。


發起投訴嘅冼澤正就話，對結果無意見，認為監警會職員有好多前廉署人員，對警隊有偏見，而且成個投訴處理咗好耐，浪費時間，「追究落去都無意思」。