被阿松鬧 肥馬澄清：「馬拉松」現時係流嘢

【明報專訊】政界早一輪不斷傳言前財政司長梁錦松有意參選下屆特首，佢最近亦頻頻亮相公開活動；而前商務及經濟發展局長馬時亨不停向人推銷梁錦松，仲公開講想做阿松嘅競選經理  。政界形容佢哋係「馬拉松」，但唔少政界人士覺得，其實馬時亨亦有意參選。

不過，噚日馬時亨接受now新聞台訪問時話，阿松最近鬧佢話佢成日同人講阿松會出嚟選，令人有誤會。肥馬仲表明「"口依"家嚟講，我覺得馬拉松係流嘢馬拉松」；佢話，雖然自己申請做競選經理，但以今日嚟講，相信佢嘅失業機會好大咁話。

馬：假定我唔重返政壇

至於佢自己係咪有野心，馬時亨話自己「有病」，6年前係因身體問題辭任局長，「你可以假定我係完全唔會行番入呢個圈子」。但請注意，馬時亨形容梁錦松唔選係話「"口依"家嚟講」，即係現在式而唔係將來式；佢自己唔選就係用「假定」呢個字眼，唔算斬釘截鐵。或者，隨着政治形勢變化，話N屆唔選嘅人都可能會改口風。