年輕人對國家隊冇咁熱情？ 蔡若蓮：歐洲恐襲分散注意力

【明報專訊】今屆里約奧運，中國隊較預期失落幾面金牌，詎料唔少網民為此感到開心，有人仲話後生仔對中國隊嘅支持，已無2008年北京奧運嗰時咁熱情。立法會教育界候選人蔡若蓮噚日幫手解畫，「因為歐洲恐襲呢，專注力會引開咗」喎。


蔡若蓮同爭取連任嘅立法會教育界議員葉建源，噚日出席商台《在晴朗的一天出發》選舉論壇，主持人問到「今屆奧運，後生仔對中國國家隊支持度冷卻，關唔關無國民教育事？」蔡若蓮回應稱，「08年作為主辦國家，同學關心多係正常……加上歐洲恐襲，如子彈射穿玻璃，會分散咗啲話題。」主持人見蔡無答國民教育就繼續問，但佢話「國民教育教學生全面認識中國，唔可以同個別事件簡單拉上」。


葉建源就認為，近年一國兩制嘅實施令港人對國家感疏離。佢覺得應該將國民教育納入公民教育，引領學生自己思考；同國民教育獨立成科嘅最大分別，就係避免用灌輸式方法，一味識話國家好，「令學生唔識獨立思考，咁就弊啦」。


蔡若蓮都話唔贊同國民教育獨立成科，認為應結合其他課程，如中文、文學、歷史、通識等，又話唔贊成極端同簡化咗嘅國民教育。