新聞類別
港聞
詳情#
【明報專訊】導演高志森之前監製嘅「香港音樂劇展演」，因為活動受盛事基金贊助，所以佢同近來受龍獅節負面新聞困擾嘅陳鑑林議員一齊，被帳委會傳召作供。唔知高導演係咪以為在座嘅委員都有睇佢啲作品，當帳委會主席石禮謙叫佢介紹自己時，佢就話「我就係我囉」，經石提醒後先介紹自己個名。
介紹自己：我就係我囉
雖然高志森唔係第一次上立法會，但就有啲蝦碌。中午小休時，佢誤以為作供完畢，離開咗立法會，搞到帳委會要急call佢返嚟，半個鐘頭後，高志森上氣唔接下氣趕返嚟，話頭先以為作完供，已經過咗海。
高又提到，因為音樂劇展演只係吸引到3000個旅客觀眾，達唔到1萬個旅客參與嘅要求，被盛事基金懲罰，扣咗20%資助額，即係少咗50萬。佢似乎仲係唔多忿氣，話4場音樂劇反應好好，又無負面新聞，唔明點解被罰。Emily聽真啲，唔通高導演暗諷緊陳鑑林？
留言 (0)
