ICC燈騷 周四閃耀

【明報專訊】巴塞爾藝術展（Art Basel）舊年首次喺香港舉行，吸引近6萬人次入場，第二屆後日（周四）起一連4日於灣仔會展開鑼，雲集全球逾3000個藝術家或收藏家作品。今屆有245間藝廊參展，亞洲藝廊佔一半，香港藝廊有24間，亞洲著名作品除咗有日本藝術家草間彌生同奈良美智嘅雕塑，仲有做過朝鮮領導人官方攝影師、中國藝術家王國鋒嘅攝影集。成人門票250元一日，學生同長者就150元。


今年展覽新增「光影現場」電影專區，喺香港藝術中心電影院放映藝術家創作同紀錄片，講述藝術家心路歷程。


元創方4米水晶雕塑

想睇免費嘢，今日起可以去中環PMQ元創方，睇英國設計組合Fredrikson Stallard所製，一個高4米、用8000顆水晶製成嘅「Prologue」雕塑，展品放至周日；半島酒店就有英國藝術家Tracey Emin嘅霓虹動畫，家至周日每晚7點至12點投射喺酒店外牆。


今屆最大亮點，係德國藝術家Carsten Nicolai構思嘅大型多媒體Alpha Pulse，周四至周六晚8點半會將燈光投射喺樓高118層嘅西九環球貿易廣場（ICC）閃爍50分鐘，燈光仲會隨音樂旋律有明暗變化。