恒生小股東想CEO年輕啲

【明報專訊】每年恒生（0011）股東會都好精彩，皆因小股東向管理層拋出嘅問題，有時真係好「啜核」。例如有位年年都向恒生管理層提問嘅伯伯，噚日又在恒生股東會上「發功」，問點解母公司匯控要每3年派一個人去恒生做CEO，而且年紀都比較大，咁對小股東唔公平。佢仲建議要起用55歲以下嘅人做CEO，匯控派人去恒生前，亦應該先諮詢恒生董事局嘅意願。


聽到小股東呢番話，台上嘅副董事長兼行政總裁李慧敏有咩感想真係不得而知。


主持會議嘅董事長錢果豐，就馬上打圓場，話總裁係公司嘅領導人物，舊年恒生業績好，證明佢係出色之人。然後冷不防又加多句︰「都想提醒大家，唔應該有年齡歧視！」


錢果豐仲笑住話自己都過咗50歲，「60 is the new 40，家下60歲等於以前40歲喇！」佢話恒生會用人唯才，唔理對方身分嚟自邊度，又話恒生金融風暴時都繼續有好業績，股東們唔使擔心囉。


email: piano@mingpao.com

[小琴密語]