踩真普聯方案 郭榮鏗道歉

【明報專訊】學民思潮召集人黃之鋒日前爆真普聯成員公民黨郭榮鏗喺商討日講真普聯嘅三軌方案係垃圾，郭榮鏗噚日火速收回言論兼且道歉，喺商台節目《在晴朗的一天出發》裏面話，當時只係真率咁講出真普聯方案有好大問題，唔記得有冇用「垃圾」嚟形容，如果有就願意收回同埋道歉。


唔記得有冇形容「垃圾」

其實任何人都有自由批評任何政改方案，只係郭榮鏗本身都係真普聯成員，政治上有道義去支持真普聯方案。佢就解釋自己當時身分係憲制顧問，要用客觀中立態度同市民解釋各方案優劣。佢話真普聯方案喺提名委員會嘅組成方法，同埋點樣為低門檻嘅問題上面內容空泛，所以先叫商討日參加者「諗清楚係咪你嘅心儀方案」。


郭榮鏗話當場要求與會者唔好對外引述佢講過嘅話，不過以Emily嘅採訪經驗，民主派係冇乜秘密嘅，如果認為講咗冇人會爆出嚟，就未免太天真喇。