太陽國際睇中澳洲馬王

【明報專訊】好多香港人都鍾意賭馬，不過「馬主」就未必個個都做過了。人稱「洗米華」嘅澳門商人周焯華，近年活躍於娛樂界同財金界，近日又獻新猷，旗下上市公司太陽國際（8029），噚日出公告話，公司使咗超過3000萬，買咗匹澳洲馬王返嚟。


太陽國際話，已經斥資3267萬，收購一匹棕色純種種馬，年齡6歲，愛爾蘭籍。呢匹馬絕非等閒之輩，所獲成就一匹布咁長，包括2012年威爾斯郡主錦標同埋2013年拿督陳振南錦標同墨爾本杯，以及今年聖佐治錦標及澳大利亞杯嘅冠軍得主。買匹馬王返嚟，要做啲咩呢？太陽國際就話，公司業務本來就好多種，有電腦軟硬件服務、酒店經營、開礦，不如試多個業務──馬匹配種啦！公告話，馬王於配種期頭三年，每年可為兩匹母馬配種，其後每年可為一匹母馬配種，公司就等住收「配種費」，每次配種盛惠6萬澳元。


買一手股票 變相做馬主

如果邊位市民對做馬主有興趣，又覺得幾千萬買匹馬太貴，其實買一手太陽國際，好似都算係過下癮做咗次馬主噃。按照太陽國際現股價0.28蚊，小股東用1400蚊買一手，以後就出去可以同人講話「我養咗匹馬」！不過呢種另類投資好難估值，究竟抵唔抵，同埋回報有幾多，就真係要睇多一陣至知啦。


email: piano@mingpao.com

[小琴密語]