內房同行破產 陳啟宗歡喜

【明報專訊】呢排內房真係負面消息多多，一方面啲樓盤賣唔出，另方面仲傳有地產商周轉不靈，隨時面對破產危機。當大家都擔心房地產可能會拖累到內地經濟，一向招積嘅恒隆主席（0101）陳啟宗話好樂意聽到內房破產，唔通真係同行如敵國，恨不得市場對手死？


陳啟宗噚日出席摩根大通同亞洲協會研討會合作舉辦嘅論壇，與會者講到中國經濟發展前景，提起最近有內房要減價促銷，陳啟宗立即笑住話：「最鍾意聽到破產，當然唔係我間公司啦」，佢解釋話如果有部分內房面臨破產，佢就好有機會可以低價買入一啲優質項目，果然係生意人本色。


佢自己都話，家仲係專注內地市場，好似噚日壽臣山同屯門地皮招標，雖然佢冇講恒隆有冇入標，但就覺得中標成數不高。


話時話，聽聞恒隆上海啲商場陸續到續租期，希望陳啟宗搞掂自己個場，再諗食人啲盤啦。


email: piano@mingpao.com

[小琴密語]