港青「必要的沉默」vs.地鐵阿叔

【明報專訊】「大聲啲！」噚日網上瘋傳一段手機短片，事緣星期一晚8點喺港鐵觀塘線，車廂內有個後生仔，疑似係背囊撞到坐隔籬嘅中年阿叔。呢段片僅兩分半鐘，聽到阿叔連珠炮發，夾雜大量粗口狂鬧後生仔。


3次道歉繼續鬧 語帶恐嚇

雖然後生仔前後已經道歉3次，但呢個「地鐵阿叔」咬住唔放，仲幾次叫人「大聲啲」道歉，甚至講到「我叫一個細佬出來打死你都得」等言語恐嚇。難得後生仔全程冷靜，有網民佩服佢EQ高到「爆晒燈」。有口痕友就引用今年文憑試中文作文試題：「今天發生了一件事情，當時我曾經想力陳己見，最後選擇了沉默。我認為沉默是必要的。」認真應景。


港鐵呼籲乘客顧己及人，唔好講粗言穢語滋擾他人，若乘客好似今次咁覺得被人滋擾，可以喺下一站落車通知月台職員跟進。據鐵路附例第28H條，任何人喺鐵路範圍講有威脅或粗言穢語，最高罰款5000元，罰款幾多要視乎實際情况而定。


大律師陸偉雄話，呢個後生仔無同阿叔「講手」係處理克制，但就話應該第一時間通知月台職員，等對方判定阿叔有無觸犯附例而發傳票。佢話阿叔有言語構成恐嚇，警方可以介入。