華洋老幼齊赴商討日

【明報專訊】噚日嘅佔中商討日三，大批泛民名人傾巢而出，到港九新界各地參與商討同投票。公民黨主席余若薇以黑超look去中文大學投票、人民力量嘅譚得志（快必）就帶埋阿媽一齊去。啱啱喺facebook宣布婚訊嘅人民力量主席袁彌明，就同男友林雨陽以情侶裝現身港島商討日。


婆婆憂公提益「蛇齋餅糉」

除咗政界名人，Emily都見到唔少銀髮一族參加。70幾歲嘅黃伯話一定支持公民提名，所以投票畀學界方案，仲話無公民提名就一定會去佔中咁講。71歲嘅葉婆婆就話會支持真普聯方案，話對公民提名有保留，擔心公民提名最終只會變成政黨互鬥動員能力，而建制派最後憑「蛇齋餅糉」就可以集齊提名，成功出閘。


洋人嘆新奇 籲「咪抄我哋」

商討不受語言限制，和平佔中喺循道衛理聯合教會北角衛理堂設立英語商討組別，來自意大利嘅Leonhard Weese參加之後話，商討經驗新奇有趣，不過因為佢未成為永久居民，所以無得投票選方案，否則佢會投票支持學界方案，因為方案嘅公民提名簡單易明。講起香港民主發展，佢話「Don't copy our model, it works poorly」。