何建宗指公提「少數人狂熱」

【明報專訊】因無申報家族持有新界東北土地業權而辭職嘅發展局長前政治助理何建宗，以清華大學法學院訪問學者身分，噚日喺內地官媒《環球時報》發表文章，標題係〈香港討論「真假普選」沒意義〉。佢話「真假普選」嘅論述只係對某些學者同政客有意義，佢認為無論點篩選，廣大選民眼睛都係雪亮，「大家有權投票，也有權不投」。何建宗似乎對中央有信心，話假如提名委員會推選一啲民意不能接受嘅候選人，導致投票率太低，咁就唔好睇。


何建宗對香港政治生態有啲牢騷，話家泛民整體向激進勢力靠攏，「公民提名從少數人的狂熱變成泛民明知不可行卻不敢說不的想法」。佢又話香港出現兩大矛盾，一個係意識形態各走各路，仇視新移民、內地遊客嘅勢力抬頭，第二種矛盾係貧富差距日益嚴重。


佢話要解決呢兩個矛盾，政府要大刀闊斧改革，影響好多人利益。何又講番以前工作範疇，以開發土地壓抑房價為例，話從發展商到私人業主等作出抵制，仲話「不少以民意代表自居的立法會議員更扮演推波助瀾的角色」。


何建宗話公民提名係「少數人狂熱」，但一班後生仔就唔係咁睇。佔領中環今日搞商討日，一眾學民思潮仔女拍短片放上網，呼籲成年人參加者支持佢哋提出嘅公民提名方案。