CY提早返工又出差

【明報專訊】原本放假至今日（5月6日）嘅特首梁振英（CY）噚日提早返工，朝早新聞處出稿，話梁已經結束休假返港，據聞噚日CY一返政總，就主持政府內部嘅早禱會，不過政府無交代點解CY提早返工，無講佢係咪要返嚟「搶救」張炳良局長處理高鐵延誤爛攤子。CY身邊人就向外講，話CY好快又出差，所以希望爭取時間工作。噚日下午新聞處又出稿，公布CY周六啟程訪問瑞典同比利時。


周六訪歐睇創新科技

新聞稿話，CY星期六（10號）晚啟程去斯德哥爾摩同布魯塞爾訪問，了解當地經濟、創新及科技發展，又會同當地政商界領袖會面，促進香港與兩地經貿關係。佢又會參觀瑞典當地嘅鐵路網絡、大學等，而科技園公司主席同管理層人員亦會參與斯德哥爾摩部分行程。CY會喺5月16號下午返港，其間由政務司長林鄭月娥署任特首。呢個行程，唔知係咪為即將成立嘅創新及科技局取經？


CY日前放假去玩，政府無公布佢去邊，但有人發現佢去過法國，出席旅發局主席林建岳女兒林恬兒與星島集團何柱國兒子何正德嘅婚禮。佢噚日返工就有公開活動，晚上出席被喻為馬壇APEC嘅「第35屆亞洲賽馬會議」開幕禮。