中聯辦官廣東話賀梁美芬

【明報專訊】梁美芬喺美孚新邨嘅議員辦事處噚日開幕，大切燒豬慶祝，除咗有經民聯自己人梁君彥同林健鋒到賀，仲請到保安局長黎棟國，以及中聯辦九龍工作部副部長劉國強（圖）。劉國強話要代中央恭賀梁美芬，佢一開口致辭，唔少在場者都大感意外，原來劉國強講得一口幾純正嘅廣東話。


梁美芬話自己扎根西九，喺美孚開辦事處係一路以來嘅願望，今次衝出黃埔花園「老巢」，呢個新辦事處意義好重大咁話。至於黎棟國就話好鍾意美孚，經常去美孚食嘢。睇嚟局長冇講大話，佢應該真係好鍾意食嘢，睇佢噚日未答完記者提問就趕住走開，原來係去攞燒豬食就知啦。