太太拒戴耀廷做張無忌

【明報專訊】早前本報報道警方應對佔領中環嘅行動代號係「光明頂」，即刻引嚟各方競猜《倚天屠龍記》角色誰屬，佔中發起人戴耀廷（Benny）噚日出席商台節目《在晴朗的一天出發》，畀主持人「志雲大師」陳志雲笑佢係張無忌，Benny好感嘆咁話，老婆唔畀佢做張無忌，因為張無忌身邊有好多美人相伴！

陳志雲：戴似張無忌「優柔寡斷」

志雲大師之後又補多句，話Benny同張無忌性格相似，因為佢「太易信人」，又問佢佔中搞咗咁耐係咪因為佢好似張無忌咁「優柔寡斷」。一講佔中，Benny當然即刻認真回應，佢話佔中搞咁多個月唔係因為自己優柔寡斷，而係因為民主運動要做足既定程序，先可以取信於人。佢又公布5月6日佔中嘅「全民政改商討日」已經有1200至1300人報名，人數同目標差唔多，當中三分之一人從未出席佔中商討日，相信會係亞洲史上最大型嘅商討活動。


戴耀廷又話，體諒「滅絕師太」政務司長林鄭月娥備受各方壓力，所以態度成日變，一時「有商有量」，一時又「一錘定音」，認真「難為了家嫂」。