英工作假期 下月又可申請

【明報專訊】手上旅費唔多但又鍾意旅行嘅年輕人，都幾嚮往工作假期（working holiday），英國係其中一個有工作假期安排嘅國家，6月19日起，勞工處接受香港/英國工作假期計劃「贊助者證明」新一輪登記。


持香港特區護照、18至30歲嘅人都可以申請，有意申請英國「青年流動計劃」者，可以喺6月19日至7月2日，向勞工處遞交「贊助者證明」登記，以便向英國申請今年工作假期簽證剩餘名額。


攞住「青年流動計劃」簽證，可以喺英國逗留最多兩年，其間可以做嘢掙旅費、修讀自資課程、當義務工作。英國每年有1000個名額留畀香港年輕人。