唐唐：曾感受民主威力

【明報專訊】政改諮詢結束前夕，政府嘅宣傳最後衝刺，再請前政務司長唐英年拍攝《來自普選的理》短片，然後放上YouTube。唐唐上一次拍嘅短片，話2017年特首選舉唔可以繞過或者削弱提委會權力，內容較艱澀，今次就簡單啲，主要係話有普選後，選民會有say。佢話自己參選過商會、立法會及2012年特首選舉，而作為參選人，要爭取每個選民支持，而同選民接觸，解釋理念同政綱，選民亦會向佢提出各種要求及期望，「所以我係切身感受到民主嘅威力！」


唐唐2012年選特首，選民其實只係1200人嘅選委會，唔知算唔算「民主嘅威力」？不過佢話，如果有普選，500萬名合資格做選民嘅市民都有份參與，所以呢，一人一票選特首，係香港民主好大嘅進步，為咗達到呢個目標，唐唐捉緊拳頭擺晒姿勢，話「大家一齊努力啦」。