「光明頂」行動憶倚天

【明報專訊】《明報》噚日頭版報道，警方部署應對佔領中環嘅行動代號叫「光明頂」（Solarpeak），令人諗起金庸小說《倚天屠龍記》裏面嘅明教總壇所在地，商台節目亦用呢個名；報道一出即刻引起電台同網民熱議。Emily搵到喺商台做咗節目《光明頂》主持11年嘅陶傑，佢就話警方應該成日有聽自己節目，覺得好榮幸，仲覺得警方用呢個名做行動代號好有智慧，大玩角色代入。


《倚天屠龍記》入面，明教被視為邪教，實為正氣，六大派部分話自己係名門正派，實為邪派。至於佔中及反佔中孰正孰邪？陶傑就話一念天堂、一念地獄，各方自己選擇啦，但希望警方企喺正義一邊，唔希望佔中好似光明頂一役咁流血收場。


陶傑：佔中學者似張無忌

小說中六大派被成崑挑撥，一齊圍攻光明頂嘅明教總壇，武功蓋世嘅張無忌突然挺身而出，免卻光明頂被滅頂，之後張無忌獲擁護做明教教主。陶傑講笑話，張無忌優柔寡斷，雖被擁護做領袖，但無領袖性格，有啲似佔中嗰班學者。咁係唔係講緊戴耀廷？佢話唔想講明係邊個。


至於六大派，陶傑就覺得係一眾「愛字頭」團體，同標榜反佔中嘅幫港出聲召集人周融。噚日朝早喺商台《在晴朗的一天出發》，主持黃潔慧就話收到聽眾電話，覺得政務司長林鄭月娥係「滅絕師太」，咁唔知佢嘅絕招係咪「一錘定音功」呢？至於邊個係挑撥離間嘅成崑？讀者要自己諗喇。