愛犬車禍亡 沈旭暉哭悼

【明報專訊】前日朝早，國際關係學者沈旭暉帶住愛犬Cargo落街，去探住喺屋苑另一邊嘅父母。點知一見到沈家父母，Cargo好興奮咁跑過去，但不幸被車撞倒，沈旭暉抱住佢跑咗好幾條街搵到醫院，但最終都救唔番Cargo。沈旭暉非常傷心，喺facebook寫咗逾2000字長文悼念愛犬，又上載一張與太太抱住Cargo嘅黑白相，唔少網友紛紛送上慰問。


相處逾月 「10年來最快樂日子」

沈旭暉有學者風格，佢本身比較cool，但喺呢篇悼念文章，就流露出對Cargo嘅愛，唔少人睇到心都戚戚然。沈旭暉話，佢與Cargo只係相處咗一兩個月，但呢段日子，係佢過去10年最快樂嘅。佢話Cargo唔止改變咗佢嘅生活，仲改變咗佢嘅人生觀，佢仲幾乎所有應酬、聚會都以不同藉口推掉，因為希望陪Cargo，亦陪太太Bonnie同自己嘅父母。有咗Cargo，沈旭暉嘅家庭時間先多番，星期六日都係整天family day。


沈旭暉話，喺獸醫醫院佢喊咗一整天，過去10年佢從來無喺別人面前喊過，佢話唔知道呢個陰影之下會唔會再養寵物，不過就會努力宣揚領養小狗嘅價值觀、動物道德觀同安全責任，同埋支援Cargo被遺棄嘅兄弟姐妹。


將成立動物權益組織

沈旭暉噚日又話，為咗讓Cargo愛的教育發揚光大，佢一群朋友打算籌備成立非牟利組織「Cargo Foundation」，宣揚動物權益。