阿婆粗口鬧爆 李梓敬無反應

【明報專訊】立法會議員諧音字疑似爆粗聽唔少，好似噚日有個阿婆喺立法會直接爆粗就好少見，呢段片即時引嚟唔少網民分享。話說噚日立法會退休保障事宜小組委員會開公聽會傾全民退休保障，自由黨青年團主席李梓敬發言時表明反對搞全民退保，又話「我哋嘅父母應該由我哋去供養，唔係要求其他人去供養」。


李反對搞全民退保 辣㷫阿婆

點知呢句就激嬲坐喺佢後幾行嘅余春梅婆婆，余婆婆代表關注長者權益大聯盟發言，佢一開口就講「若果你話將來你呢個X街……」，委員會副主席張國柱即刻叫停佢，話唔可以用呢個字眼，叫佢修飾下字眼。


余婆婆之後講﹕「你老竇老母係人，人哋老竇老母唔係人呀？你估你生在香港就咁富貴呀？冇我哋呢啲人去捱，捱工廠捱起樓，你有咁富貴？」然後爆一句「你喺X門拉出來就咁大呀？」張國柱再次提醒佢唔好用呢啲字眼，余婆婆之後冇再爆粗，但就話「你肯定我哋要人哋養，你第日冇衰？第日或者你衰咗，跌入坑渠，要入坑渠拿飯食呢」。


李梓敬被後面嘅余婆婆指住鬧，未見有太大反應，其後就被人發現用電話玩轉珠遊戲。李梓敬會後同Emily講，尊重別人嘅言論自由，而主持會議嘅議員亦有嘗試終止人講粗口，佢樂於接受其他人嘅意見。佢重申自己嘅主張，認為政府可透過綜援等扶貧措施協助有需要嘅人，但反對有能力供養父母者，將供養父母嘅責任推卸畀社會。