食署職員被指蝦婆婆

【明報專訊】噚日facebook有好多人轉載攝影師陳葦岳（Ryann）上載嘅一輯相，質疑食環署職員蝦婆婆。Ryann話前日傍晚行經長沙灣政府合署對開，見到一個食環署職員同婆婆對峙，話婆婆擺賣阻街。Ryann同婆婆解釋職員可能會收走佢啲嘢，婆婆即刻執嘢，但職員用身體擋住婆婆，婆婆轉身執第二邊，佢就「移形換影」擋住，仲踩住啲貨物話「呢啲係證物」，唔畀婆婆執走。


署方：接4投訴 會調查

Ryann話職員講嘢幾大聲，部分市民睇唔過眼，其中幾個夾手夾腳執晒婆婆啲嘢，職員就喺噓聲中離開。食環署回覆Emily話接到4宗有關執法嘅投訴，佢哋會調查事件同按程序處理。發言人話，當日接到市民投訴有人擺賣阻街，派咗一名小販管理主任巡查，發現有兩名年邁無牌小販擺賣，於是勸喻佢哋離開，並無提檢控。


但Ryann質疑，若職員畀婆婆離開，點解要踩住佢啲嘢，擾攘成半個鐘呢？Emily噚日去現場搵街坊求證，有雜貨店女店員話婆婆不時喺度擺賣，但佢見唔到事發經過，希望食環署查清楚。