病童夢成真 齊齊去旅行

【明報專訊】總部喺美國嘅慈善機構「願望成真基金」，畀3至17歲患重病小朋友一個機會實踐願望。基金全球有37間分會，成立15年嘅香港分會，每年平均為香港同澳門近百病童圓夢，噚日宣布第1500個實現願望嘅小朋友。


鍾意台灣「多嘢食又浸溫泉」

10歲嘅建成患先天心臟病，經過幾次心室糾正手術後，正康復讀緊小三，獲基金支持暑假同家人到台灣旅行。建成話想去台灣因為「有好多嘢食，仲有溫泉浸」，今次仲獲醫生許可，係佢人生首次搭飛機。


5歲嘅思澄自小患白血病，同去年6月確診淋巴癌、17歲嘅建業，亦同樣因為基金喺上個月實現旅遊夢想。香港分會主席劉仲恆話，申請者須先獲主診醫生書面推薦，再由職員批核，去年分會就為102名病童圓夢。佢提到近年個案中近四成希望要禮物，主要為電腦或iPad平板電腦，其次有三成想旅行，今次就有小朋友希望6月到巴西睇世界盃同埋見球星。