趕製平安包 終於請到師傅

【明報專訊】下星期二就係佛誕，長洲有搶包山活動。每年長洲太平清醮賣過萬個平安包嘅郭錦記餅店，噚日已經賣咗五六千個平安包，前日起停賣其他餅食，全力做平安包。之前話驚請唔到整包師傅嘅老闆郭錦全話，最終請到5、6個師傅喺明日開工。今年平安包仍賣8蚊，預計佛誕前要加班做包，老闆娘則大嘆辛苦，但見到客人排長龍都買唔到會好內疚，「唯有落力啲做」。


細路爬包山架過登頂癮

最近有商人攞咗「平安」標記去做商標註冊，郭老闆話唔擔心有公司搶咗「平安」標誌，佢話除非畀人告，如果唔係未必會轉換平安包上嘅字樣，又話萬一唔畀用「平安」標誌，唔排除轉為「世界平安」，相信客人唔會因為字樣轉咗就唔幫襯。


賣「平安茶」嘅茶軒老闆郭嘉田就認為註冊申請唔會成功。長洲太平清醮值理會主席翁志明就話係對方侵權，已寫緊反對書，下星期之後先有時間研究下一步行動。


噚日長洲已經好熱鬧，因為有個攀爬嘉年華，畀市民試吓爬上14米高嘅包山架，唔少人一家大細試玩，有小朋友「登頂」後仲話下年要再嚟玩。嘉年華帶旺咗長洲生意，商戶話比平日多咗超過10%生意，預計下星期二會再多兩三成生意。