網民帶大便海港城「大解」

【明報專訊】早前有內地小童喺香港隨街便溺，觸發中港矛盾，有網民噚日喺facebook發起「光復」尖沙嘴海港城行動，近30人喺下午3點帶同黃色糞便道具，到海港城先後8次模仿早前內地遊客大便，有內地遊客就指港人小事化大。


途人讚幽默 內地客：小事化大

響應號召嘅網民喺海港城內外，帶埋大便道具扮內地人「拉屎」，大唱改編國歌「中國民族到了要大便的時候」，又喺商場內同內地遊客相隔兩層樓「隔空爆粗」對罵，所經嘅名店紛紛落閘，防止佢哋入舖頭騷擾，行動歷時1個鐘，全程分別有10多名警員同保安維持秩序。


退休人士張先生喺海港城門外目擊「光復」行動後，指網民好幽默，行動可能係「積極回應蘇錦樑局長嘅包容論」，佢又提議舉辦「大便節」，畀港人真係隨街大便，相信政府唔會唔包容。


內地客李先生就話﹕「小孩年紀小，應該是迫不得已才會在街上便溺，可以原諒，香港人不必小事化大。」被問會唔會響應內地人發起針對香港嘅罷買行動，李先生就話罷買只係個別嘅人發起，唔代表大家意見。