金管局幫「神沙」增值

【明報專訊】相信大家落街買嘢，都唔帶太多「神沙」（硬幣），有時寧願用八達達或信用卡比錢，都係嫌找番一堆「銀仔」又重又麻煩，結果積埋積埋，喺屋企堆起一棟棟「神沙之塔」。為咗令更多硬幣可以循環使用，節省鑄幣成本，金管局今年9月中，將會推出兩架「流動硬幣收集車」，免費為市民兌換手上硬幣，市民仲可以揀兌換成鈔票或增值至八達通卡，非常方便。


推流動收集車 用「神沙」增值八達通

呢個試驗計劃為期兩年，兩架收集車會循環服務18區，主要停駐響方便市民但又唔會阻礙交通嘅地點，金管局遲啲會透過網站公布地點同時間表。


其實唔少銀行都有提供免費硬幣存款服務，每日數量上限為30枚至500枚不等，但特登去銀行「唱錢」，排隊都要唔少時間，又唔可以用來增值八達通。呢架流動硬幣收集車推出後，可能都會幾受歡迎。不過，金管局只係準備咗兩架車，唔知夠唔夠用呢？


[小琴密語]