馬路出現單車徑？

【明報專訊】紅磡東鐵站附近嘅紅磡南道，早幾日馬路上突然出現咗單車嘅白色標誌，一班單車友喺網上見到都叫好，但原來呢幾個標誌只係塗鴉，路政署前日收到消息，即刻派工人將標誌剷走。路政署同Emily講，噚日巡查時又發現大角嘴必發道都有4個單車標誌，而大角嘴合桃街路邊仲掛埋兩個單車指示牌，噚晚派咗人清除。


路政署火速清除塗鴉標誌

Emily搵過資料，呢個單車標誌有特別意義，叫「Sharrow」，係美國認可嘅單車共用馬路標誌，提醒駕駛人士呢個路段要同單車共用。香港踩單車都限制多多，難怪單車友對呢個標誌夢寐以求啦。


對於政府火速清除標誌，有網友就話「補番將軍澳海濱公園單車徑個大洞，又唔見咁神速」。路政署同Emily講，任何人未經許可喺道路上畫上標誌，會觸犯《道路交通條例》第51條，可處罰款1000元同監禁3個月。運輸署又話，家單車友係可以共用馬路，不過要遵守交通規則。