阿松又曝光 飲食節目照上

【明報專訊】前財政司長梁錦松繼續曝光保持人氣，早幾日去教育學院同學生大談人生道理，佢連電視台綜藝飲食節目都去埋，喺節目軟銷中學時嘅感人故事，話初中時唔係太勤力，中五會考成績平平，原校升中六機會渺茫，喺英華書院流下男兒淚，好彩畀當時嘅副校長陳耀南發現，學校同情阿松嘅處境，阿松先可以升學，有今日嘅成就。


上電視憶母校感人事

阿松上咗now101台《輝哥的饌賞2》節目做嘉賓，同主持人吳錫輝講自己嘅住事。佢話自己中六中七先發奮讀書，之前都係懶懶閒，仲試過一次英文作文考試得兩分！中五會考成績平平，見到成績單先喊住後悔，而副校長同外籍校長同情佢家貧，所以畀佢原校升讀，仲畀阿松喺學校飯堂留宿溫書。


阿松2003年因為偷步買車事件辭職，佢為當年呢件事解畫，話身在政府高位嘅人，如果畀人懷疑，將來想推政策就會好困難，佢又話自己離開，其實得多於失，因為事件令佢學會「謙順」。想睇阿松講故仔，今晚10時半就可以睇到。