Google街景背包 「睇」驗自然

【明報專訊】Google街景拍攝裝置「街景背包（Trekker）」嚿年登陸香港，該背包裝有15個鏡頭，孭喺身上可以深入車去唔到嘅小巷及偏僻郊區山徑，目前已經影咗香港23個獨特景點，好似坪洲、南丫島，甚至龍脊、港島徑，同特首梁振英豪宅所位處嘅貝璐道都有份。Google話，選取嘅景點都係深受港人同旅客鍾意嘅離島與自然景點，等大家坐喺屋企都可以「睇」驗大自然。


Google 2010年喺香港推出街景服務至今，有用過街景車、街景三輪車、手推車等拍攝器材，今次就將街景背包帶嚟香港。


呢部機嘅頂部係球狀拍攝鏡頭組，有15個不同角度鏡頭，當工作人員開始行嘅時候，攝影鏡頭就會每2.5秒拍攝一次，相片質素有7500萬像素，然後就可以將影像拼合成360度全景圖像。全球嚟計，Google街景車同背包客已經運作咗7年，部分場景地點更已經記錄咗好多次。