夏千福帶同胞入政總

【明報專訊】有外國勢力「入侵」政總？美國駐港總領事夏千福好鍾意喺香港四圍搵食，但噚日佢帶同一班美國國會代表走咗去政府總部，原來去咗同環境局長黃錦星會面，交流對環保嘅意見。夏千福離開政總時笑容滿面，但就無回應記者提問，只係講咗兩句Thank you。


環境局發言人話，美國國會代表對香港嘅環保政策好有興趣，局長喺會上介紹《香港清新空氣藍圖》，不過整個會面約30分鐘，所以大家只係好簡單咁交流意見。香港空氣一直唔係咁好，唔知夏千福有無乘機同局長反映吓呢？美國國會代表團今日亦會同立法會議員閉門會晤。