《南都》製尋港廁攻略

【明報專訊】網上熱傳內地小童喺旺角街頭便溺嘅片段，仲引發中港網民罵戰。人有三急，喺香港搵廁所真係咁難？內地報章《南方都市報》（南都）就幫遊客整咗篇「香港尋廁攻略」，教大家點樣喺香港搵廁所，仲「特別提醒」話﹕「千萬不要在公眾場合大小便，這在香港涉嫌違法。」


攻略將香港可能有廁所嘅地方分咗4級，其中「首選」大商場，仲點名時代廣場、崇光百貨、海港城、朗豪坊呢啲「大品牌」，話佢哋「除了一層之外，幾乎每層都有廁所」。


次選快餐店大酒樓

「次選」係「快餐店、大酒樓」，話「雖然非常侷促，但解決一時之需還是沒有問題的」；再其次就輪到「星級酒店」，話「香港的酒店星級再高，對所有市民都是免費開放的……內急時遇到的星級酒店，都是你救急的選擇」。


不過，貫通全港嘅港鐵站就屬於「不選」喇，南都話「千萬不要去地鐵站找廁所，那無異於『緣木求魚』」，因為「與內地不同，香港地鐵站一般不設公廁」。


勿去港鐵 否則「緣木求魚」

任何人難免人有三急，小朋友更加難忍，但一篤「便便」引發中港矛盾，仲引發罵戰，那邊內地網民話要罷遊香港，本港網民就反擊話要搞便溺攝影比賽。點樣令小朋友去得暢快，市民遊客都不妨參考呢篇攻略，學識喺香港搵廁所啦。