Tesla主席：比亞迪？

【明報專訊】Tesla掌門人Elon Musk親臨中國為首批Tesla買家交車，噚日小琴見識咗萬人空巷只為望一眼「電動車狂人」嘅盛况，今日就去聽下狂人點樣描述佢嘅「中國夢」。對於Tesla本土化、降成本等眾多問題，Elon都答得好謹慎，但對佢嘅中國對手比亞迪（1211）就例外。


Elon話，佢認識比亞迪，主要來自於股神巴菲特對佢嘅投資。不過比亞迪嘅車未喺美國市場銷售，佢未有機會體驗，對其電動車無足夠嘅了解，無法對其打分，「但我睇咗比亞迪電動車嘅相，睇起嚟唔係咁好囉」。狂人已經唔止一次喺公開場合提及比亞迪，早前喺其他採訪中聽到比亞迪個名就大笑，然後反問記者：「你見過比亞迪嘅車？我覺得公司至少要先有個好產品吧。」佢態度頗為不屑。雖然Elon喺交車儀式後接受訪問時好謙虛話Tesla喺中國仍是「爬行階段」，但每次提及比亞迪或其他競爭對手時，都告誡「佢哋都要好好努力」，就盡顯電動車一哥嘅風範了。


email: piano@mingpao.com

[小琴密語]