搶包山增500「金包」 務求爭崩頭

【明報專訊】一年一度嘅長洲太平清醮下月6日舉行，適逢今年10周年，為咗令晚上嘅重頭戲搶包山比賽更緊張刺激，大會喺包山頂部增設咗500個用金色字寫嘅12分包。長洲太平清醮值理會副主席何麗安話，成座包山有9000個包，第二層嘅9分包有1600個，餘下係3分及1分包，相信比賽一開始，最高分嘅包會好快被搶晒，然後再搶9分包，認為咁樣安排可以拉開選手分數上嘅距離。


當晚派1650入場券

以去年為例，包山王郭嘉明搶到141個平安包，今年搶包山共有12個選手，如果每人搶到百幾個包，至少有過千個包會被摘下，但最高分嘅「金包」得500個，絕對唔夠分，可以想像到時戰况一定好激烈。大會喺當晚10時起，喺長洲消防局旁派發1650張入場券，先到先得。


對於有私人公司申請註冊平安包上嘅平安標誌，康文署同長洲太平清醮值理會正尋求法律意見，首先會提出反對，亦會研究點樣保護個標誌，日後喺搶包山活動繼續使用。