公民黨「黨員」鬧風波

【明報專訊】離島區東涌北區議會補選周日舉行，有包括公民黨成員在內3人角逐，同時亦有3間機構做票站民調，但有區內人士發現，其中一個叫「活力離島」嘅調查機構由公民黨「黨員」組成，咁樣做民調應該唔啱規矩喎。不過公民黨就話，啱啱先知「活力離島」做民調一事，感到「震驚」，但澄清事件同公民黨無關。


公民黨：擔心對手做文章

公民黨中人告訴Emily，噚日聽到民調一事感到好尷尬，擔心會被對手做文章，影響選情，因畢竟有「黨員」喺票站做民調，會被人話唔公正。公民黨人話，按該黨名冊，「活力離島」5名核心成員中，1人早已退黨，另外4人提出咗退黨成年，各人亦無交會費，但4人一直都無回覆公民黨辦理好退黨手續，所以理論上4人仍算係「黨員」，但實際上無聯繫。該黨今日會聯絡選舉事務處申報，仲話睇吓選舉事務處會唔會撤銷民調申請。


「活力離島」成員稱已退黨

不過，「活力離島」成員胡柏麟反駁，佢哋兩年幾前已提出退黨，以佢自己為例，2011年已公開表示跟黨魁梁家傑鬧翻決裂，之後無參加過公民黨活動，所以不存在「黨員」身分。胡柏麟話佢哋成員之前都做過兩次選舉票站調查，而今次申請喺東涌做時，都唔知公民黨成員報名參選。


選舉事務處：會查證

選舉事務處話，做票站調查嘅機構喺提交申請表時，須簽署聲明確認該機構無任何成員參選，亦不能支持任何候選人，調查機構亦唔准喺投票結束前公布票站調查結果。該處話會就事件查證。今次補選候選人包括公民黨余俊翔、校長梁兆棠及航空保安張芳嫻。