政府 佔中 「鬥片」sell政改

【明報專訊】政府嘅首階段政改諮詢將喺下個月就結束，政府近日再「出招」，邀請前政務司長唐英年拍短片，講成個特首普選設計。唐唐喺片中大講《基本法》45條，話普選要按實際情况同循序漸進原則。不過佔領中環行動亦唔蝕底，用1987年喺香港播出嘅日劇《海誓山盟》劇情同劇照，以父母唔畀個女「自由戀愛」，比喻揀伴侶都要有真正選擇，玩集體回憶。市民受落邊一套，真係見仁見智。


唐唐喺《來自普選的理》系列短片粉墨登場，話「如果有啲提出嘅方案，會造成繞過、或削弱提委會提名權嘅話，我相信呢啲方案都好難符合《基本法》」。


睇唐唐片見出閘人數玄機？

佢話《基本法》規定，日後特首候選人會由一個有廣泛代表性的提委會，按民主程序提名產生。值得留意嘅係，提委會喺政府呢般動畫中，由4組人數一樣嘅提委會委員組成，但代表候選人嘅公仔，就有3個清晰、一個若隱若現，唔知係咪暗示最終中央畀3至4個人出閘參選呢？


佔中用懷舊愛情片劇情

至於佔中，秘書處引述咗一段《海誓山盟》劇情嚟比喻政改，劇情話女主角阿香係公認嘅乖乖女，但父母就用不同原因，將批准阿香拍拖嘅日期一拖再拖，最終阿香到咗28歲，父母仍認為應該先讓父母以集體意志為阿香挑選戀愛對象。阿香最後「必要的沉默」，問「自由戀愛有沒有國際標準？」不過小故事只有文字版，短片仍然係陳健民「齋講」，對於生活忙碌嘅年輕人，吸引力少咗啲。