沈祖堯搞聯合國派對

【明報專訊】有立法會議員同網民近排鬧大學收得太多非本地生，但大學除咗搞教育，亦係供各地學生文化交流嘅場所，中大校長沈祖堯早排就搞咗個文化交流聯歡晚會，目的係鼓勵不同地區嘅學生打破文化界限，大家和諧共處。


百學生jam歌跳舞

晚會請咗百幾個來自超過20個國家同地區嘅國際學生、內地生同本地生參加，當晚有來自美國、德國同內地嘅學生彈結他、Ukulele、木箱鼓合奏英語流行曲；而來自俄羅斯、瑞典同美國嘅學生就玩搖滾音樂；芬蘭、日本同內地學生跳西藏舞助興等，氣氛熱鬧。


網民城大抗議 促先收本地生

不過，另一邊廂嘅城市大學就無咁和諧，約10名手持龍獅旗嘅網民響應「香港人優先」號召，噚日下午去到城大抗議，要求城大優先取錄本地生，預留學士、碩士、博士等八成學位畀本地生。佢哋將請願信交畀校方代表後就散水。