預製件整擋土牆 慳5星期

【明報專訊】近年工程造價飈升，唔少承建商起樓時都用多咗預製組件，務求節省時間及成本，但原來起擋土牆都可以用預製組件㗎。金門建築上個月完成吐露港公路（馬窩與泰亨路段）一段嘅擴闊工程，該路段全長3.5公里，由雙程三線行車改為雙程四線行車，當中往粉嶺方向大埔南出口附近需要建造巨型擋土牆。


金門建築合約經理譚建輝同Emily講，今次搭建擋土牆過程中，放棄傳統用模板建造方式，即係工人毋須搭建臨時支架及模板；反而用咗450塊預製組件嚟起擋土牆，每塊預製組件長4米、闊2米，由東莞工場預先做好，再運送到工地裝嵌，而每塊預製組件嘅角位，都係以圓角凹位設計，拼合時角位就變成圓形，方便安裝排水孔。結果縮短咗施工時間，由原本預計要5個月，到最後約4個月內完成，快咗5個禮拜。佢話，未來金門建築會研究仲有無其他地方可以多用預製組件。