為節目備課 陳志雲去六四館

【明報專訊】支聯會「六四紀念館」噚日試館，Emily發現商台首席智囊陳志雲（圖）都有去參觀。佢同Emily講，支聯會能夠喺有限資源下設立一個永久紀念館，所以都有興趣睇吓。同時，佢亦為今朝嘅電台節目做功課，因為佢打算喺節目上同聽眾介紹吓紀念館。陳志雲逗留咗一陣就離開。


陳志雲參觀後都有啲意見畀支聯會主席李卓人，佢話明白資源有限，場地有啲細，相信如果有一班同學仔去到都會幾擠迫，換展板時亦可能會唔方便，所以佢建議可以用電子投射方式展示資訊。另外，陳志雲都有意見畀大廈業主，佢話噚日行後樓梯去紀念館時，發現後樓梯堆放咗唔少雜物，所以都會喺節目中提醒吓大廈各層人士。