財爺暗諷長毛做爛騷

【明報專訊】財爺曾俊華上星期去立法會，被長毛梁國雄掟陰司紙抗議，當時財爺以一句「行開啦」回應咗；但事隔數日財爺喺「我的網誌」暗喻有人欺善怕惡搞「爛騷」，佢話除咗會叫對方「go away」（行開啦），有時候要加上一句意思相同但更直接嘅「助語詞」先得。


話要加「助語詞」表立場

財爺噚日語帶諷刺不點名評長毛。佢話讀中學時課餘成日喺紐約街頭玩，見慣各式衝突，而佢指有一類人特別惹人反感，話呢類人表面上好「惡」，但實際上只會挑選一啲唔會反抗嘅人來找麻煩以「展示實力」，只敢「做騷」攞威。佢又話「爛騷」一而再重複難免感到煩厭，有時唔等「騷」完，佢會伸手推開對方，斯文啲就講句go away，如對方仲煩住佢，就要加句「助語詞」表達立場。


長毛：為官不義要鬧

長毛噚日聽到財爺暗諷都有啲㷫，話自己唔使用「助語詞」回應，直接叫財爺「go to hell」（落地獄）就夠。佢話財爺涼薄，話全港長者、市民面對高官先至係無力還手，「為富不仁、為官不義嘅人要鬧，係老竇老母教嘅！」至於佢仲會唔會掟嘢，長毛就話同曾俊華無私怨，上次掟佢係因為唔滿意財爺提出設立未來基金，但唔肯攞錢搞退休保障，所以先掟「未來金錢」陰司紙。


財爺其實一棍打兩人，除咗長毛，仲不點名批評行會前成員林奮強。林上周話財爺用8招控開支增長做法「豬頭炳」，財爺就話「父母一直都禁止我們兄妹對任何人說不敬的話，即使是叫人做『豬頭炳』，都一樣會被責罵」。