黃明樂：遭《信報》抽文章

【明報專訊】專欄作家黃明樂前日喺《信報》「見觸城市」專欄借最近中學文憑試作文題目「必要的沉默」，寫咗篇〈不必要的沉默〉，大爆自己嚿年5月曾經畀《信報》抽起一篇關於長實拆售雍澄軒嘅文章，佢最後「選擇了沉默，乖乖奉上另一篇風花雪月的文章」。黃明樂話當時無公開事件，係「唔想因為鹵莽而失去一個發表意見嘅地方」，時任《信報》執行總編輯陳伯添就話，噚日睇報紙先知道有件咁嘅事。


指信報回覆「只談風月」

黃明樂話，當日佢有再三追問原因，甚至話可以刪除涉及法律風險嘅部分，但最後只得到8個大字回覆「只談風月，不談政事」。


黃明樂同Emily講，相信每位專欄作家都好珍惜自己嘅地盤，所以當時未有立刻行動。不過近日傳媒界接二連三發生事件、有《信報》專欄作家也被抽稿，加上佢接到《信報》通知，5月份改版，暫時唔需要佢寫專欄，所以決定分享呢件事。黃明樂強調唔認為改版有問題，因為每份報紙都有權咁做。


陳伯添就話「當日無處理過呢件事」，自己只係負責財經新聞，並冇負責專欄嘅事，又話自己已離開《信報》，所以唔可以代表《信報》講任何事。Emily噚日想搵現任老總郭艷明回應事件，但係搵唔到佢。