公民黨候選人被貼身記錄

【明報專訊】離島區區議會東涌北議席將會喺本月27日補選，Emily聽聞近日選舉氣氛相當熱烈，有「熱心市民」喺候選人嘅街站出沒，拍攝監場，佢哋身上無任何競選衣飾，只係對本身係大律師嘅公民黨候選人余俊翔特別有興趣，即使余同東涌市民握手、影相甚至一個眼神交流，呢班「熱心市民」都會用紙筆做記錄。


前東涌北區議員林悅因企圖以欺騙手段取得金錢利益罪名成立，被判入獄21個月、緩刑2年，佢嘅議席將於27日補選。除咗余俊翔，候選人仲包括報稱獨立嘅教聯會黃楚標學校校長梁兆棠，同任職航空保安嘅張芳嫻。


Emily聽聞3個候選人當中，以梁校長嘅街站氣氛最熱烈，試過一個街站有30個義工，仲得到多個建制派議員落區拉票，包括民建聯李慧琼、新民黨主席葉劉淑儀同副主席田北辰等。不過泛民議員話，部分建制派議員只係落去一陣就閃人，有啲仲顧住派自己卡片，都唔知係為梁校長拉票，定係為立法會選舉鋪路。