迷途羊闖教會自由行

【明報專訊】今時今日香港人好難先會親近到野生動物，但前晚就有一隻好可愛嘅山羊走入粉嶺某教會「散步」。Emily噚日喺社交網站見到有動物義工，上載咗一張「毛鬆鬆」嘅山羊相，見佢眼仔碌碌四圍望，又喺一班人面前慢慢踱步，簡直好似落區「巡視業務」一樣。義工話，相信呢隻係蒙古羊或者阿根廷山羊，喺香港好少見，未知佢響邊度嚟，暫時由附近農莊收養。


事發前晚6點幾，有動物義工喺粉嶺嘅粉嶺樓村附近，突然見到一隻好似披住張地氈嘅動物喺村屋之間行過，望真啲先發現佢係隻山羊，但隻羊喺路上慢慢踱步非常淡定，仲行咗入附近一間教會。義工擔心佢有危險，所以就閂埋教會大門，再同身邊友人傾吓點好。呢隻淡定山羊其後行咗上2樓一間房，仲好乖咁趴咗喺地下。


義工：盡力尋原來主人

不過，佢哋擔心將山羊送去漁護署有可能畀人道毀滅，所以不停聯絡附近農莊，直至前晚10點幾終於喺附近搵到個農莊畀隻「神秘流浪羊」暫住。義工話，未知山羊有無人飼養或者畀人遺棄，會盡力幫佢搵返原來主人，搵唔到的話，農莊亦都可以畀佢長住。